Enrique en treze años, de mientra que el Rey don Sancho fué sobre Çaragoça, como vos avemos contado, el Rey don Garcia de Portogal tomó por fuerza a doña Urraca, su hermana, muy grand pieça de la tierra que le diera su padre. E ella quando lo sopo començó de llorar, diziendo muchas vezes: Hay Rey don Fernando, en mal punto partistes vos los vuestros Reynos, ca toda la tierra se perderá por vos: e assi se compliera lo que dixo mi amo Arias Gonçalo: ca pues el Rey don Garcia que es mi hermano menor me deshereda, e passó la jura que fizo a mi padre el Rey don Fernando, el Rey don Sancho que es el mayor, e que fizo la jura por fuerça, contradiziendo la particion siempre, mas querrá hy fazer otras cosas: e por ende ruego yo a Dios que cedo seays desheredados pues assi me desheredades, amen!" Despues que el Rey don Sancho que estava alboroçado contra sus hermanos, oyó dezir como el Rey don Garcia fuera contra su hermana e la desheredara, plogole mucho dello: ca tenia que avia achaque para fazer lo que tenia en el coraçon, e dixo:,, Pues que el Rey don Garcia mi hermano quebrantó la jura que fizo a mi padre, quierole yo toller el Reyno." Estonce embió por sus ricos omes, e por el Cid Ruydiez, e dixoles ansi:,, Mi padre el Rey partió los Reynos que devian ser mios, e él fizo esto contra derecho: e agora el Rey don Garcia, mi hermano, quebrantó la jura e desheredó a doña Urraca mi hermana e por esto ruegovos que me aconsegedes como faga, e como gelo demande yo: ca yo quierole quitar el Reyno." Levantóse estonce el Conde don Garcia e dixole: ,, Señor, quien vos consejará en tal fecho como este? Non sé ome en el mundo que vos quiera aconsejar que ayades de passar el mandamiento e la jura que fezistes a vuestro padre." Quando esto oyó el Rey don Sancho fué muy sañudo e muy ayrado contra el Conde don Garcia, e dixole:,, Tiradmevos delante, ca yo por vos non seré bien aconsejado." De sí tomó al Cid por la mano e salió con él a parte, e dixole:,,Bien sabedes, mio Cid, que quando el Rey, mio padre, me vos encomendó, que me mandó sopena de la su maldicion que vos oviesse por consegero, todo lo que oviesse de fazer fuesse con vuestro consejo, e yo

e

assi lo fize fasta oy dia: e siempre me aconsejastes lo mejor: e yo por ende divos un Condado en el mio Reyno, e tengolo por bien compleado. E agora ruegovos que me aconsegedes lo mejor, en guisa que cobre los Reynos: ca si de vos non he consejo, non lo entiendo de haver de ome del mundo."

CAP. XXXVI.

Estonce al Cid pesóle mucho, e dixole al Rey:,, Señor, quien cuydades que vos aconsege en este fecho? Non me semeja aguisado de vos yo consejar que passedes el mandamiento de vuestro padre: ca vos bien sabedes que me fizo jurar en sus manos que siempre vos consejasse bien: e mientra que yo lo podiere fazer, fazer lo he ansi." E dixole estonce el Rey:,, Mio Cid, yo non tengo que passo la jura del Rey mio padre, porque contradixe siempre la particion: e la jura que a mi padre fize, fizela con grand premia. E de mas que el Rey don Garcia mi hermano ha quebrantada la jura, e de derecho todos los Reynos son mios: e por ende quiero que me aconsegedes como los pueda juntar: ca non ha cosa en el mundo que me lo puede estorvar si non muerte." E quando el Cid vió que por ninguna manera non lo podia sacar de aquel consejo dixole, que pusiesse el amor con el Rey don Alfonso, en tal que le diesse passada para el Reyno de don Garcia: e si esto no podiesse aver, que le consejava que non començasse tal cosa: e el Rey don Sancho tovo que lo consejava bien. Estonce el Rey don Sancho embió sus cartas al Rey don Alfonso, que se veniesse a ver con él en Safagun. E quando el Rey don Alfonso ovo leydo las cartas, maravillóse mucho, que queria aquello ser: pero embióle dezir, que seria hy con él. E ayuntaronse los Reyes amos a dos en Safagun: e desque se vieron en uno, dixo el Rey don Sancho:,,Hermano, bien sabedes como el Rey don Garcia nuestro hermano passó la jura de nuestro padre, e desheredó a nuestra hermana doña Urraca, e yo por esto que fizo quierole tomar el Reyno e ruegovos que me ayudedes." E el Rey don Alfonso dixo que lo non faria, nin passaria contra el mandamiento.de

su padre, nin la jura que jurara: ca se tenia por entero de lo que avia. Estonce el Rey don Sancho dixo: que lo dexasse passar por su Reyno, e que le daria su parte de quanto ganasse: e el Rey don Alfonso otorgógelo. E aun sobre esto pusieron dia señalado en que se viessen otra vez; e pusieron vicarios entre sí, veynte de Leon, e veynte de Castilla, que los fiziessen estar a cada uno en lo que pusiessen: de sí partieronse dende.

CAP. XXXVII.

El Rey don Sancho ayuntó muy grandes gentes, Castellanos e Leoneses, e Navarros, e Vizcaynos, e Austurianos, de las Estremaduras, e Aragoneses, para yr sobre su hermano el Rey don Garcia. E de sí embió a Alvar Fañez, primo del Cid, a desafiar al Rey don Garcia, e mandóle dezir, que le dexasse el Reyno, si non que lo desafiasse por él. E Alvar Fañez comoquier que le pesasse ovo de fazer el mandado de su señor. E fuese para el Rey don Garcia, e contóle el mandado con que yva. Quando el Rey don Garcia oyó el mandado, pesóle mucho, e con gran cuyta dixo: Señor Jesu Christo, miembresete el pleyto el la jura que fezimos al Rey don Fernando nuestro padre, pero de malos de mis peccados yo fuí el primero que la passé que quité a mi hermana doña Urraca el su heredamiento de su padre." E dixo Alvar Fañez:,,Dezid a mi hermano, que non me quiera passar la jura que fizo a nuestro padre: e si esto non quiere fazer, yo me defenderé dél quanto pudiere. Alvar Fañez tornóse con esta respuesta al Rey. E el Rey don Garcia llamó estonce un cavallero Asturiano que dezian Ruyximenez e mandóle, que fuesse a su hermano el Rey don Alfonso, e que le contasse estas nuevas, de como lo mandara desafiar el Rey don Sancho, e que le queria tomar el Reyno: e que le rogava como hermano, que él non dexasse passar por su Reynado. E el Rey don Alfonso dixole:,, Dezid a mi hermano, que lo non ayudaré, nin lo estorvaré: e si se pudiere defender que me plazerá.,,Estonce el cavallero tornóse con

66

esta respuesta para el Rey don Garcia, e dixole como se amparasse, que non tenia ayuda ninguna en su hermano.

CAP. XXXVIII.

El Rey don Garcia era ome muy fuerte e de grand coraçon, e quando oyó la respuesta que, su hermano el Rey don Alfonso le embiava dezir, quiso sacar su hueste contra él. E el Rey don Garcia avia un consegero por quien se guiava mucho, e que sabia todas sus poridades, e era ome de muchos consejos: e era contra todos los omes buenos. E ellos veyendo el grand peligro en que estavan, e el grand daño que venia a su señor por la grand mengua dél, ovieron su acuerdo, e matarongelo delante. E el Rey fué muy sañudo, e ovo muy grand pesar, e tovo que le fizieran muy grand desonra e menospreciamento, porque gelo mataran delante: esto fizieron ellos, porque le pedian merced muchas vezes que lo partiesse de sí, e él non quiso. Mas el Rey con gran saña apremiólos mas que fazia ante, e amenazavalos diziendo, que nunca avrian su gracia nin el su amor: e ellos temiendose desto, partieronse muchos dél.

CAP. XXXIX.

Andando en el quarto año del su Reynado, el Rey don Sancho, como estava asmado fuése para Galicia, e como estavan desavenidos ganó la tierra muy ligeramente. E el Rey don Garcia alçóse a Portogal, e embió mandado por toda la tierra, que veniessen a él cavalleros e peones, e juntóse gran hueste. El Conde don Nuño de Lara, e el Conde de Monçon, e el Conde don Garcia de Cabra levavan la delantera del Rey don Sancho con gran cavalleria. E el Rey don Garcia salió a ellos; e fué el torneo muy grande, de guisa que morieron hy trezientos cavalleros del Rey don Sancho. E alli se yva compliendo lo que dezia Arias Gonçalo, que se matarian hermanos con hermanos: parientes con parientes. Quando el Rey don Sancho sopo el daño que avia rescebido en los Condes, cavalgó con

quanta gente tenia e acorriólos.

Mas quando lo vió

venir don. E el Rey

Garcia, non se atrevió a esperarlo e començóse yr. don Sancho fué en alcance empos él fasta Portogal.

CAP. XL.

El Rey don Garcia dixo estonce a los suyos: „Amigos, non avemos tierra do fuyamos al Rey don Sancho mi hermano ; lidiemos con él e vençamos o muramos hy todos, que mas vale muerte honrada, que non aver este estragamiento en nuestra tierra." E de sí apartó los Portogaleses, e dixoles luego assí: ,,Amigos, vos sodes cavalleros nobles e loçanos, e es menester que todo mal prez se pierda aqui, e que vos finque siempre el bueno: ca vos avedes prez de fazer pocos señores e buenos entre vos: pues conviene que fagades oy bueno de mí, e será vuestra pro, e vuestra honra : e si yo ende bien saliere galardonarvos lo he muy bien, de guisa que entendades que he sabor de fazervos bien, e de darvos muy grand algo." E ellos dixeron, que lo servirian e que lo ayudarian muy de grado quanto pudiessen, e que non fincaria por ellos: e él gradesciógelo mucho. E de alli fué fablar con los otros Gallegos, e dixoles: „Amigos, vos sodes buenos cavalleros e leales, e nunca fallamos que por vos fuesse señor desamparado en campo, e metome en vuestras manos, ca soy cierto que me aconsejaredes bien e lealmente, é que me ayudaredes lo mejor que podredes. E ya vedes como nos trae el Rey don Sancho mi hermano acogidos, e non veo ál que fagamos si non lidiar con él, o morir, o vencer: pero si vos entendedes ál, faré quanto vos me consegedes." Estonce le dixeron los Gallegos, que lo servirian e lo guardarian lealmente quanto pudiessen, e que farian quanto él mandasse: e que la lid tenian ellos por mejor. Pero dize el Arçobispo don Rodrigo, que ovieron de yr pedir ayuda a los Moros: e que fué el Rey don Garcia con trezientos cavalleros a pedirles ayuda. E que el Rey que tomara trezientos cavalleros de los suyos, e se fuera para los Moros, e les pidió que le diessen ayuda contra su hermano, e que les faria dar el