Executeur de mon testament que le Grand CARDINAL DE RICHELIEV! et de voir de la haut, qu'on se souvienne icy bas que l'ay sceu discerner, à quelle excellence et hautesse d'ame, ie debvois assigner la protection du plus excellent et plus haut present que les Muses ayent faict aux hommes, depuis les siecles triomphants des Grecs et des Romains! Vous, MONSEIGNEVR, Autheur de tant d'Ouvrages immortels de diverse sorte, qu'il semble que vous ayez entrepris d'enrichir et d'amplifier l'Empire de l'Immortalité, ne l'obligez vous pas à vous offrir par nos vœux, pour une espece de recompense, les plus

nobles des biens qu'elle tient d'ailleurs, comme ce Livre: ouy mesmes à les reputer d'autant plus seurement immortels, qu'en les vous offrant, elle croid les appuyer aucunement sur le Destin de vostre Eminence : De laquelle ie demeureray sans fin,

MONSEIGNÉVR,

Tres humble et tres obeïssante

servante,

A. Paris, le 12 juin 1635.

GOVRNAY.

PREFACE

SVR

LES ESSAIS DE MICHEL,

SEIGNEVR

DE MONTAIGNE;

PAR SA FILLE D'ALLIANCE.

Si vous demandez au vulgaire quel est Cesar, il vous respondra que c'est un excellent capitaine si vous le luy monstrez luy mesme sans nom, voire en guerre, à l'exercice de ces grandes qualitez par lesquelles il estoit tel : sa prudence, labeur, vigilance, prevoyance, precaution, perseverance, ordre, art de mesnager le temps, et de se faire aymer et craindre, sa resolution, sa vigueur à ne rien relascher, et ses admirables conseils sur les nouvelles et promptes occurrences: plus, ces contrarietez d'action en temps et lieu : craindre, oser, reculer, courre sus, prodiguer, resserrer, et mesmes ravir où besoin est : cruauté, clemence, simulation, franchise. Si, dis ie, aprez luy avoir faict contempler toutes ces qualitez et ces actions, ouy mesmes en guerre, comme il est dit, mais hors l'apparat de chef et hors la victoire, vous luy demandez quel homme c'est là; certes il le vous donnera, s'il vient à poinct, pour un des fuyars de la bataille de Pharsale: parce qu'il ne sçait si c'est par telles parties qu'on se rend grand capitaine : et que pour iuger sur elles purement, d'un qui le

il em

soit ou puisse estre, il le faut estre soy mesme, ou capable de le devenir par instruction. Enquerez semblablement ce mesme vulgaire, ce qu'il luy semble de Platon, il vous rebattra l'oreille des louanges d'un celeste philosophe : mais si vous laissez tomber en ses mains le Sympose ou l'Apologie desnuez de ce haut nom de leur pere, il en fera des farces et s'il entre en la boutique d'Apelles, portera bien son tableau, mais il n'achetera que le nom du peintre. Ces considerations m'ont tousiours mise en doute de la valeur des esprits, que le credit populaire suivoit de son mouvement, et sans authorité precedente des belles ames: authorité certes encore, meurie par divers âges l'entends, passee en usage fixe, qui est l'unique estoille du pole, qui peut droictement guider les approbations populaires. Car le peuple n'a garde de cognoistre par luy mesme la valeur des esprits, manquant d'esprit : ny de mettre à prix, ou de suivre sainement en cela, une approbation ou authorité, pour equitable qu'elle soit, qui pour estre nouvelle, reste debattuë: puis qu'il ne sçauroit par ce mesme deffaut d'esprit, cognoistre le poids des tenans et des assaillans en ce debat. Celuy qui gaigne multitude d'admirateurs parmy la commune, et de son iugement propre, ne peut pas estre grand : puis que pour avoir beaucoup de bons iuges, il faut avoir beaucoup de semblables outre qu'il est vray, que la fortune et la vertu favorisent rarement un mesme suiet. Le peuple est une foule d'aveugles; quiconque se vante de son approbation, se vante de paroistre honneste homme à qui ne le voit pas : adioustons, que c'est une espece d'iniure, d'estre loué de ceux que vous ne voudriez pas ressembler. Qu'est ce que le dire de la presse? (si ceste question n'est desia trop vuidee par les anciens) ce que nulle ame sage ne voudroit ny dire ny croire qu'est ce que la raison? le contrepoil de son opinion: et ie trouve la reigle de bien vivre aussi certaine, à fuir l'exemple et le sens du siecle, qu'à suivre

la philosophie ou la theologie. Il ne faut entrer chez le peuple spirituellement ou corporellement, que pour avoir le plaisir d'en sortir : or peuple et vulgaire s'estend iusques là, qu'il est en un estat, sur tout en nostre saison, moins de personnes entierement non vulgaires, que de princes, pour rares que les princes y soient. le lairray toutefois à Seneque, touchant, ce me semble, ceste corde de la neantise populaire, la charge de dire le reste mieux que moy. Xerxes contemplant ses dixsept cens mille hommes, s'escria de douleur, sur ce que dans cent ans il n'en resteroit un seul en vie. Il nous faudroit tous les iours faire un cry bien divers, sur pareil nombre; de ce qu'il ne s'y trouveroit pas à l'adventure un sage, ny qui pis est un iuste. Tu devines desia, lecteur, que ie veux rechercher les causes du froid recueil, que nostre vulgaire fit d'abord aux Essais : mais trouvees, ou non, laissons là ses opinions, qui ne nous doivent peut estre pas engendrer plus de soucy, hors les suiets ausquels elles blessent nostre fortune, qu'elles engendrent d'honneur à leur maistre. Le proverbe est tresvray; que s'il faut souhaiter de la louange, c'est de ceux qui sont louables. Certes ie rends à ce propos un sacrifice au bon-heur, qu'une si fameuse et digne main que celle de Iustus Lipsius, ait ouvert par escrit public, les portes de la louange aux Essais et en ce que la fortune l'a choisi pour en parler le premier de ceste part, elle a ce semble voulu luy defferer une prerogative de suffisance en son siecle, et nous advertir tous de l'escouter comme nostre maistre. L'admiration dont ils me transsirent, lors qu'ils me furent fortuitement mis en main au sortir de l'enfance, m'alloit faire reputer visionnaire : si quelqu'un pour me ramparer contre un tel reproche, ne m'eut descouvert l'eloge tressage, que ce Flamand en avoit rendu depuis quelques annees à leur autheur mon pere. Lecteur, ayant à desirer de t'estre agreable, ie me pare du beau titre de ceste alliance, puisque ie n'ay point d'autre ornement :

et n'ay pas tort de ne vouloir appeller que du nom paternel, celuy duquel tout ce que ie puis avoir de bon en l'ame est issu. L'autre qui me mit au monde, et que mon desastre m'arracha dez l'enfance, tresbon pere, orné de vertus, et habile homme, auroit moins de ialousie de se voir un second, qu'il n'auroit de gloire de s'en voir un tel.

So

Le don du iugement est la chose du monde que les hommes possedent de plus diverse mesure: le plus digne et avare present que Dieu leur face : leur perfection : tous biens, ouy les essentiels, leur sont inutiles, si cestuy là ne les mesnage : et la vertu mesme tient sa forme de luy. Le seul iugement esleve les humains sur les bestes, crates sur eux, les anges sur Socrates: et le seul ingement nous met en droite possession de Dieu cela s'appelle l'ignorer et l'adorer en la foy. Pythagoras disoit aussi, que la cognoissance de Dieu ne pouvoit estre autre en nous, que l'extrême effort de nostre imaginative vers la perfection. Or vous plaist il avoir l'esbat de voir eschauder plaisamment les froids estimateurs des Essais ? mettez leur iugement sur le troittoir à l'examen des livres anciens. Ie ne dis pas pour leur demander, si Plutarque et Seneque sont de grands autheurs, car la reputation les dresse en ce poinct là; mais pour sçavoir de quelle part ils le sont plus si c'est en la faculté de iuger, si c'est en celle d'inventer et de produire, et comme eux qui devisent de ces facultez les entendent ou comprennent qui frape plus ferme que son compagnon en tel et tel endroit : quelle a deu selon leur matiere estre leur conduite et leur fin en escrivant : quelle des fins d'escrire est la meilleure en general quelles de leurs pieces ils pourroient perdre avec moins d'interest: quelles ils devroient conserver avant toutes, et pourquoy. Faites leur apres esplucher une comparaison de l'utilité de la doctrine de ces deux ou de leurs semblables, contre celle des autres escrivains : et finalement trier en raisonnant sur les causes, ceux de ceste plantu