Imágenes de página
PDF
ePub
[graphic]

To ransake in the tas of bodies dede,
Hem for to stripe of harneis and of wede,
The pillours dide hir besinesse and cure,
After the bataille and discomfiture.

And so befell, that in the tas they found,
Thurgh girt with many a grevous blody wound,
Two yonge knightes ligging by and by,
Bothe in on armes, wrought ful richely:
Of whiche two, Arcita highte that on,
And he that other highte Palamon.
Not fully quik, ne fully ded they were,
But by hir cote-armure, and by hir gere,
The heraudes knew hem wel in special,
As tho that weren of the blod real
Of Thebes, and of sustren two yborne.
Out of the tas the pillours han hem torne,
And han hem caried soft unto the tente
Of Theseus, and he ful sone hem sente
To Athenes, for to dwellen in prison
Perpetuel, he n'olde no raunson.
And whan this worthy duk had thus ydon,
He toke his host, and home he rit anon,
With laurer crouned as a conquerour;
And ther be liveth in joye and in honour
Terme of his lif; what nedeth wordes mo?
. And in a tour, in anguish and in wo,
Dwellen this Palamon and eke Arcite,
For evermo, ther may no gold hem quite.
Thus passeth yere by yere, and day by day,
Till it felle ones in a morwe of May
That Emelie, that fayrer was to sene
Than is the lilie upon his stalke grene,

And fresher than the May with floures newe,
(For with the rose colour strof hire hewe;
I n'ot which was the finer of hem two)
Er it was day, as she was wont to do,
She was arisen, and all redy dight;
For May wol have no slogardie a-night.
The seson priketh every gentil herte,
And maketh him out of his slepe to sterte,
And sayth, "Arise, and do thin observance."
This maketh Emelie han remembrance
To don honour to May, and for to rise.
Yclothed was she freshe for to devise.
Hire yelwe here was broided in a tresse,
Behind hire back, a yerde long I gesse.
And in the gardin at the Sonne uprist
She walketh up and doun wher as hire list.
She gathereth floures, partie white and red,
To make a sotel gerlond for hire hed,
And as an angel hevenlich she song.
The grete tour, that was so thikke and strong,
Which of the castel was the chef dongeon,
(Wher as these knightes weren in prison,
Of which I tolde you, and tellen shal)
Was even joinant to the gardin wall,
Ther as this Emelie had hire playing.

Bright was the Sonne, and clere that morwening,
And Palamon, this woful prisoner,
As was his wone, by leve of his gayler
Was risen, and romed in a chambre on high,
In which he all the noble citee sigh,
And eke the gardin, ful of branches grene,
Ther as this freshe Emelia the shene
Was in hire walk, and romed up and doun.
This sorweful prisoner, this Palamon
Goth in his chambre roming to and fro,
And to himselfe complaining of his wo:
That he was borne, ful oft he sayd, alas!
And so befell, by aventure or cas,

That thurgh a window thikke of many a barre
Of yren gret, and square as any sparre,
He cast his eyen upon Emelia,

And therwithal he blent and cried, A!
As though he stongen were unto the herte.
And with that crie Arcite anon up sterte,
And saide, "Cosin min, what eyleth thee,
That art so pale and dedly for to see?
Why cridest thou? who hath thee don offence?
For goddes love, take all in patience
Our prison, for it may non other be.
Fortune hath yeven us this adversite.
Som wikke aspect or disposition
Of Saturne, by som constellation,

Hath yeven us this, although we had it sworn,
So stood the heven whan that we were born,
We moste endure: this is the short and plain."
This Palamon answerde, and sayde again;
"Cosin, forsoth of this opinion
Thou hast a vaine imagination.
This prison caused me not for to crie.
But I was hurt right now thurghout min eye
Into min herte, that wol my bane be.
The fayrnesse of a lady that I se
Yond in the gardin roming to and fro,
Is cause of all my crying and my wo.
I n'ot whe'r she be woman or goddesse.
But Venus is it, sothly, as I gesse."

And therwithall on knees adoun he fill,
And sayde: "Venus, if it be your will
You in this gardin thus to transfigure,
Beforn me sorweful wretched creature,
Out of this prison helpe that we may scape."
And if so he our destinee be shape
By eterne word to dien in prison,
Of our lignage have som compassion,
That is so low ybrought by tyrannie."
And with that word Arcita gan espie
Wher as this lady romed to and fro.
And with that sight hire beautee hurt him so,
That if that Palamon were wounded sore,
Arcite is hurt as moche as he, or more.
And with a sigh he sayde pitously:
"The freshe beautee sleth me sodenly
Of hire that rometh in the yonder place.
And but I have hire mercie and hire grace,
That I may seen hire at the leste way,
I n'am but ded; ther n'is no more to say."
This Palamon, whan he these wordes herd,
Dispitously be loked, and answerd:
"Whether sayest thou this in ernest or in play?"
"Nay," quod Arcite, "in ernest by my fay.
God helpe me so, me lust full yvel pley."

This Palamon gan knit his browes twey.
"It were," quod he, "to thee no gret honour
For to be false, ne for to be traytour
To me, that am thy cosin and thy brother
Ysworne ful depe, and eche of us to other,
That never for to dien in the peine,
Til that the deth departen shal us tweine,
Neyther of us in love to hindre other,
Ne in non other cas, my leve brother;
But that thou shuldest trewely forther me
In every cas, as I shuld forther thee.
This was thin oth, and min also certain ;
I wot it wel, thou darst it not withsain.
Thus art thou of my conseil out of doute.
And now thou woldest falsly ben aboute
To love my lady, whom I love and serve,
And ever shal, til that min herte sterve.

[ocr errors]

"Now certes, false Arcite, thou shalt not so.
I loved hire firste, and tolde thee my wo
As to my conseil, and my brother sworne
To forther me, as I have told beforne.
For which thou art ybounden as a knight
To helpen me, if it lie in thy might,
Or elles art thou false, I dare wel sain."

This Arcita full proudly spake again.
"Thou shalt," quod he, "be rather false than I.
And thou art false, I tell thee utterly.
For par amour I loved hire first or thou.
What wolt thou sayn? thou wisted nat right now
Whether she were a woman or a goddesse.
Thin is affection of holinesse,

And min is love, as to a creature:
For which I tolde thee min aventure
As to my cosin, and my brother sworne.

"I pose, that thou lovedest hire beforne:
Wost thou not wel the olde clerkes sawe,
That who shall give a lover any lawe?
Love is a greter lawe by my pan,
Then may be yeven of any erthly man:
And therfore positif lawe, and swiche decree
Is broken all day for love in eche degree.
A man moste nedes love maugre his hed:
He may not fleen it, though he shuld be ded,
All be she maid, or widewe, or elles wif.

"And eke it is not likely all thy lif
To stonden in hire grace, no more shal I:
For wel thou wost thyselven veraily,
That thou and I be damned to prison
Perpetuel, us gaineth no raunson.

"We strive, as did the houndes for the bone,
They fought all day, and yet hir part was none.
Ther came a kyte, while that they were so wrothe,
And bare away the bone betwix hem bothe.
And therfore at the kinges court, my brother,
Eche man for himself, ther is non other.
Love, if thee lust; for I love, and ay shal:
And sothly, leve brother, this is al.
Here in this prison mosten we endure,
And everich of us take his aventure."

Gret was the strif, and long betwix hem twey,
If that I hadde leiser for to sey:
But to th' effect. It happed on a day,
(To tell it you as shortly as I may)
A worthy duk that highte Perithous,
That felaw was to this duk Theseus

Sin thilke day that they were children lite,
Was come to Athenes, his felaw to visite,
And for to play, as he was wont to do,
For in this world he loved no man so:
And he loved him as tendrely again.
So wel they loved, as olde bokes sain,
That whan that on was ded, sothly to telle,
His felaw wente and sought him doun in Helle:
But of that storie list me not to write.

Duk Perithous loved wel Arcite,
And had him knowe at Thebes yere by yere:
And finally, at request and praiere
Of Perithous, withouten any raunson
Duk Theseus him let out of prison,
Frely to gon, wher that him list over all,
In swiche a gise, as I you tellen shall.

This was the forword, plainly for to endite,
Betwixen Theseus and him Arcite:
That if so were, that Arcite were yfound
Ever in his lif, by day or night, o stound
In any contree of this Theseus,

And he were caught, it was accorded thus,

1

That with a swerd he shulde lese his hed;
Ther was non other remedie ne rede.
But taketh his leve, and homeward he him spedde;
Let him beware, his nekke lieth to wedde.

How gret a sorwe suffereth now Arcite ?
The deth he feleth thurgh his herte smite;
He wepeth, waileth, crieth pitously;
To sleen himself he waiteth prively.
He said; "Alas the day that I was borne !
Now is my prison werse than beforne:
Now is me shape eternally to dwelle
Not only in purgatorie, but in Helle.
Alas! that ever I knew Perithous.
For elles had I dwelt with Theseus
Yfetered in his prison evermo.

Than had I ben in blisse, and not in wo.
Only the sight of hire, whom that I serve,
Though that I never hire grace may deserve,
Wold have sufficed right ynough for me.

"O dere cosin Palamon," quod he,
"Thin is the victorie of this aventure.
Ful blisful in prison maiest thou endure:
In prison certes nay, but in paradise.
Wel hath Fortune yturned thee the dise,
That hast the sight of hire, and I th' absence.
For possible is, sin thou hast hire presence,
And art a knight, a worthy and an able,
That by som cas, sin Fortune is changeable,
Thou maiest to thy desir somtime atteine.
But that am exiled, and barreine
Of alle grace, and in so gret despaire,
That ther n'is erthe, water, fire, ne aire,
Ne creature, that of hem maked is,
That may me hele, or don comfort in this,
Wel ought I sterve in wanhope and distresse.
Farewel my lif, my lust, and my gladnesse.

"Alas, why plainen men so in commune
Of purveyance of God, or of Fortune,
That yeveth hem ful oft in many a gise
Wel better than they can hemself devise?
Som man desireth for to have richesse,
That cause is of his murdre or gret siknesse.
And som man wold out of his prison fayn,
That in his house is of his meinie slain.
Infinite harmes ben in this matere.
We wote not what thing that we praien here.
We faren as he that dronke is as a mous.
A dronken man wot wel he hath an hous,
But he ne wot which is the right way thider,
And to a dronken man the way is slider,
And certes in this world so faren we.
"We seken fast after felicite,
But we go wrong ful often trewely.
Thus we may sayen alle, and namely I,
That wende, and had a gret opinion,
That if I might escapen fro prison
Than had I ben in joye and parfite hele,
Ther now I am exiled fro my wele.
Sin that I may not seen you, Emelie,
I n'am but ded; ther n'is no remedie."
Upon that other side Palamon,
Whan that he wist Arcita was agon,
Swiche sorwe he maketh, that the grete tour
Resouned of his yelling and clamour.
The pure fetters on his shinnes grete
Were of his bitter salte teres wete.

"Alas!" quod he, "Arcita, cosin min,
Of all our strif, God wot, the frute is thin.
Thou walkest now in Thebes at thy large,
And of my wo thou yevest litel charge.

[graphic]

Thou maist, sith thou hast wisdom and manhede,
Assemblen all the folk of our kinrede,
And make a werre so sharpe on this contree,
That by som aventure, or som tretee,
Thou maist have hire to lady and to wif,
For whom that I must nedes lese my lif.
For as by way of possibilitee,

Sith thou art at thy large of prison free,
And art a lord, gret is thin avantage,
More than is min, that sterve here in a cage.
For I may wepe and waile, while that I live,
With all the wo that prison may me yeve,
And eke with peine that love me yeveth also,
That doubleth all my tourment and my wo."
Therwith the fire of jalousie up sterte
Within his brest, and hent him by the herte
So woodly, that he like was to behold
The box-tree, or the ashen ded and cold.
Than said he; "O cruel goddes, that governe
This world with binding of your word eterne,
And writen in the table of athamant
Your parlement and your eterne grant,
What is mankind more unto you yhold
Than is the shepe, that rouketh in the fold?
For slain is man, right as another beest,
And dwelleth eke in prison, and arrest,
And hath siknesse, and gret adversite,
And oftentimes gilteles, parde.

"What governance is in this prescience,
That gilteles turmenteth innocence?
And yet encreseth this all my penance,
That man is bounden to his observance
For Goddes sake to leten of his will,
Ther as a beest may all his lust fulfill.
And whan a beest is ded, he hath no peine;
But man after his deth mote wepe and pleine,
Though in this world he have care and wo:
Withouten doute it maye stonden so.

"The answer of this lete I to diviues, But wel I wote, that in this world gret pine is, Alas! I see a serpent or a thefe, That many a trewe man hath do meschefe, Gon at his large, and wher him lust may turn. But I moste ben in prison thurgh Saturn, And eke thurgh Juno, jalous and eke wood, That hath wel neye destruied all the blood Of Thebes, with his waste walles wide. And Venus sleeth me on that other side For jalousie, and fere of him Arcite."

Now wol I stent of Palamon a lite,
And leten him in his prison still dwelle,
And of Arcita forth I wol you telle.

The sommer passeth, and the nightes long
Encresen double wise the peines strong
Both of the lover, and of the prisoner.
I n'ot which hath the wofuller mistere.
For shortly for to say, this Palamon
Perpetuelly is damned to prison,
In chaines and in fetters to ben ded;
And Arcite is exiled on his hed
For evermore as out of that contree,
Ne never more he shal his lady see.

You lovers axe I now this question,
Who hath the werse, Arcite or Palamon?
That on may se his lady day by day,
But in prison moste he dwellen alway.
That other wher him lust may ride or go,
But sen his lady shal he never mo.
Now demeth as you liste, ye that can,
For I wol tell you forth as I began.

Whan that Arcite to Thebes comen was,
Ful oft a day he swelt and said Alas,
For sen his lady shal he never mo.
And shortly to concluden all his wo,
So mochel sorwe hadde never creature,
That is or shal be, while the world may dure.
His slepe, his mete, his drinke is him byraft,
That lene he wex, and drie as is a shaft.
His eyen holwe, and grisly to behold,
His hewe falwe, and pale as ashen cold,
And solitary he was, and ever alone,
And wailing all the night, making his mone.
And if he herde song or instrument,
Than wold he wepe, he mighte not be stent.
So feble were his spirites, and so low,
And changed so, that no man coude know
His speche ne his vois, though men it herd.
And in his gere, for all the world he ferd
Nought only like the lovers maladie.
Of Ereos, but rather ylike manie,
Engendred of humours melancolike,
Beforne his hed in his celle fantastike.
And shortly turned was all up so doun
Both habit and eke dispositioun
Of him, this woful lover dan Arcite.
What shuld I all day of his wo endite?

Whan he endured had a yere or two
This cruel torment, and this peine and wo,
At Thebes, in his contree, as I said,
Upon a night in slepe as he him laid,

Him thought how that the winged god Mercury
Beforne him stood, and bad him to be mery.
His slepy yerde in hond he bare upright;
An hat he wered upon his heres bright.
Arraied was this god (as he toke kepe)

As he was whan that Argus toke his slepe;
And said him thus: "To Athenes shalt thou wende;
Ther is thee shapen of thy wo an ende."

And with that word Arcite awoke and stert.
"Now trewely how sore that ever me smert,"
Quod he, "to Athenes right now wol I fare.
Ne for no drede of deth shal I not spare
To se my lady, that I love and serve;
In hire presence I rekke not to sterve."
And with that word he caught a gret mirrour,
And saw that changed was all his colour,
And saw his visage all in another kind.
And right anon it ran him in his mind,
That sith his face was so disfigured
Of maladie the which he had endured,
He mighte wel, if that he bare him lowe,
Live in Athenes evermore unknowe,
And sen his lady wel nigh day by day.
And right anon he changed his aray,
And clad him as a poure labourer.
And all alone, save only a squier,
That knew his privitee and all his cas,
Which was disguised pourely as he was,
To Athenes is he gon the nexte way.
And to the court he went upon a day,
And at the gate he proffered his service,
To drugge and draw, what so men wold devise.
And shortly of this matere for to sayn,
He fell in office with a chamberlain,
The which that dwelling was with Emelie.
For he was wise, and coude sone espie
Of every servant, which that served hire.
Wel coude he hewen wood, and water bere,
For he was yonge and mighty for the nones,
And therto he was strong and big of bones

To don that any wight can him devise.
A yere or two he was in this service,
Page of the chambre of Emelie the bright;
And Philostrate he sayde that he hight.
But half so wel beloved a man as he,
Ne was ther never in court of his degre.
He was so gentil of conditioun,

That thurghout all the court was his renoun.
They sayden that it were a charite
That Theseus wold enhaunsen his degre,
And putten him in worshipful service,
Ther as he might his vertues exercise.
And thus within a while his name is spronge
Both of his dedes, and of his good tonge,
That Theseus hath taken him so ner
That of his chambre he made him a squier,
And gave him gold to mainteine his degre;
And eke men brought him out of his contre
Fro yere to yere ful prively bis rent.
But honestly and sleighly he it spent,

That no man wondred how that he it badde.
And thre yere in this wise his lif he ladde,
And bare him so in pees and eke in werre,
Ther n'as no man that Theseus hath derre.
And in this blisse let I now Arcite,
And speke I wol of Palamon a lite.

In derkenesse and horrible and strong prison
This seven yere hath sitten Palamon,
Forpined, what for love and for distresse.
Who feleth double sorwe and hevinesse
But Palamon? that love distraineth so,
That wood out of his wit he goth for wo,
And eke therto he is a prisonere
Perpetuell, not only for a yere.

Who coude rime in English proprely
His martirdom? forsoth it am not I,
Therfore I passe as lightly as I may.
It fell that in the seventh yere in May
The thridde night, (as olde bokes sayn,
That all this storie tellen more plain)
Were it by aventure or destinee,
(As, whan a thing is shapen, it shal be,)
That sone after the midnight Palamon,
By helping of a frend, brake his prison,
And fleeth the cite faste as he may go,
For he had yeven drinke his gayler so
Of a clarre, made of a certain wine,
With narcotikes and opie of Thebes fine,

That all the night though that men wold him shake,
The gailer slept, he mighte not awake.
And thus he fleeth as faste as ever he may.

The night was short, and faste by the day,
That nedes cost he moste himselven hide.
And to a grove faste ther beside

With dredful foot than stalketh Palamon.
For shortly this was his opinion,

That in that grove he wold him hide all day,
And in the night than wold he take his way
To Thebes ward, his frendes for to preie
On Theseus to helpen him werreie.
And shortly, eyther he wold lese his lif,
Or winnen Emelie unto his wif.

This is the effect, and his entente plein.

Now wol I turnen to Arcite agein,
That litel wist how neighe was his care,
Til that Fortune had brought him in the snare.
The besy larke, the messager of day,
Saleweth in hire song the morwe gray;
And firy Phebus riseth up so bright,
That all the orient laugheth of the sight

And with his stremes drieth in the greves
The silver dropes, hanging on the leves,
And Arcite, that is in the court real
With Theseus the squier principal,
Is risen, and loketh on the mery day.
And for to don his observance to May,
Remembring on the point of his desire,
He on his courser, sterting as the fire,
Is ridden to the feldes him to pley,
Out of the court, were it a mile or twey.
And to the grove of which that I you told,
By aventure his way he gan to hold,
To maken him a gerlond of the greves,
Were it of woodbind or of hauthorn leves,
And loud he song agen the sonne shene.

"O Maye, with all thy floures and thy grene,
Right welcome be thou, faire freshe May,
I hope that I some grene here getten may."
And from his courser, with a lusty herte
Into the grove ful hastily he sterte,
And in a path he romed up and doun,
Ther as by aventure this Palamon
Was in a bush, that no man might bim se,
For sore afered of his deth was he.
Nothing ne knew he that it was Arcite.
God wot he wold have trowed it ful lite.
But soth is said, gon sithen are many yeres,
That feld hath eyen, and the wood hath eres.
It is ful faire a man to bere him even,
For al day meten men at unset steven.
Ful litel wote Arcite of his felaw,
That was so neigh to herken of his saw,
For in the bush he sitteth now ful still.
Whan that Arcite had romed all his fill,
And songen all the roundel lustily,
Into a studie he fell sodenly,

As don these lovers in hir queinte geres,
Now in the crop, and now doun in the breres,
Now up, now doun, as boket in a well.
Right as the Friday, sothly for to tell,
Now shineth it, and now it raineth fast,
Right so can gery Venus overcast
The hertes of hire folk, right as hire day
Is gerfall, right so changeth she aray.
Selde is the Friday all the weke ylike.

Whan Arcite hadde ysonge, he gan to sike,
And set him doun withouten any more:
"Alas!" quod he, "the day that I was bore!
How longe, Juno, thurgh thy crueltee
Wilt thou werreien Thebes the citee?
Alas! ybrought is to confusion

The blood real of Cadme and Amphion:
Of Cadmus, which that was the firste man,
That Thebes built, or firste the toun began,
And of the citee firste was crouned king.
Of his linage am and his ofspring
By veray line, as of the stok real:
And now I am so caitif and so thral,
That he that is my mortal enemy,
I serve him as his squier pourely.
And yet doth Juno me wel more shame,
For I dare not beknowe min owen name,
But ther as I was wont to highte Arcite,
Now highte I Philostrat, not worth a mitr.
Alas! thou fell Mars, alas! thou Juno,
Thus hath your ire our linage all fordo,
Save only me, and wretched Palamon,
That Theseus martireth in prison.
And over all this, to slen me utterly,
Love hath his firy dart so brenningly

[graphic]

Ystiked thurgh my trewe careful hert,
That shapen was my deth erst than my shert.
Ye slen me with your eyen, Emelie ;
Ye ben the cause wherfore that I die.
Of all the remenant of min other care
Ne set I not the monntance of a tare,
So that I coud don ought to your plesance."

And with that word he fell doun in a trance
A longe time; and afterward up sterte
This Palamon, that thought thurghout his herte
He felt a colde swerd sodenly glide:
For ire he quoke, no lenger wolde he hide.
And whan that he had herd Arcites tale,
As he were wood, with face ded and pale,
He sterte him up out of the bushes thikke,
And sayde: " False Arcite, false traitour wicke,
Now art thou hent, that lovest my lady so,
For whom that I have all this peine and wo,
And art my blood, and to my conseil sworn,
As I ful oft have told thee herebeforn,
And hast bejaped here duk Theseus,
And falsely changed hast thy name thus ;
I wol be ded, or elles thou shalt die.
Thou shalt not love my lady Emelie,
But I wol love hire only and no mo.
For I am Palamon thy mortal fo.

And though that I no wepen have in this place,
But out of prison am astert by grace,
I drede nought, that eyther thou shalt die,
Or thou ne shalt nat loven Emelie.

[ocr errors]

Chese which thou wolt, for thou shalt not asterte."
This Arcite tho, with ful dispitous herte,
Whan he him knew, and had his tale herd,
As fers as a leon, pulled out a swerd,
And sayde thus ;
5 By God that sitteth above,
N'ere it that thou art sike, and wood for love,
And eke that thou no wepen hast in this place,
Thou shuldest never out of this grove pace,
That thou ne shuldest dien of min hond.
For I defie the suretee and the bond,
Which that thou saist that I have made to thee.
What? veray fool, thinke wel that love is free,
And I wol love hire maugre all thy might.
But, for thou art a worthy gentil knight,
And wilnest to darraine hire by bataille,
Have here my trouth, to-morwe I will not faille,
Withouten weting of any other wight,
That here I wol be founden as a knight,
And bringen barneis right ynough for thee;
And chese the beste, and leve the werste for me.
And mete and drinke this night wol I bring.
Ynough for thee, and clothes for thy bedding.
And if so be that thou my lady win,
And sle me in this wode, ther I am in,
Thou maist wel have thy lady as for me."
This Palamon answered, "I grant it thee."
And thus they ben departed til a-morwe,
Whau eche of hem hath laid his faith to borwc.
O Cupide, out of alle charitee!

O regne, that wolt no felaw have with thee!
Ful soth is sayde, that love ne lordship
Wol uat, his thankes, have no felawship.
Wel finden that Arcite and Palamon.

Arcite is ridden anon unto the toun,
And on the morwe, or it were day light,
Ful prively two harueis hath he dight,
Both suffisant and mete to darreine

The bataille in the feld betwix hem tweine.
And on his hors, alone as he was borne,
Hle carieth all this harneis him beforne;

And in the grove, at time and place ysette,
This Arcite and this Palamon ben mette.
Tho changen gan the colour of hir face.
Right as the hunter in the regne of Trace
That stondeth at a gappe with a spere,
Whan hunted is the lion or the bere,
And hereth him come rushing in the greves,
And breking bothe the boughes and the leves,
And thinketh, here cometh my mortal enemy,
Withouten faille, he must be ded or I;
For eyther I mote slen him at the gappe;
Or he mote slen me, if that me mishappe:
So ferden they, in changing of hir hewe,
As fer as eyther of hem other knewe.
Ther n'as no good day, ne no saluing.
But streit withouten wordes rehersing,
Everich of hem halpe to armen other,
As frendly, as he were his owen brother.
And after that, with sharpe speres strong
They foineden eche at other wouder long.
Thou mightest wenen, that this Palamon
In his fighting were as a wood leon,
And as a cruel tigre was Arcite :
As wilde bores gan they togeder smite,
That frothen white as fome for ire wood.
Up to the ancle foughte they in hir blood.
And in this wise I let hem fighting dwelle,
And forth I wol of Theseus you telle.

The Destinee, ministre general, That executeth in the world over al The purveiance, that God hath sen beforne; So strong it is, that though the world had sworne The contrary of a thing by ya or nay, Yet somtime it shall fallen on a day That falleth nat efte in a thousand yere. For certainly our appetites here, Be it of werre, or pees, or hate, or love, All is this ruled by the sight above. This mene I now by mighty Theseus, That for to hunten is so desirous, And namely at the grete hart in May, That in his bed ther daweth him no day, 'That he n'is clad, and redy for to ride With hunte and horne, and houndes him beside. For in his hunting hath he swiche delite, That it is all his joye and appetite To ben himself the grete hartes bane, For after Mars he serveth now Diane.

Clere was the day, as I have told or this, And Theseus, with alle joye and blis, With his Ipolita, the fayre quene, And Emelie, yclothed all in grene, On hunting ben they ridden really. And to the grove, that stood ther faste by, In which ther was an hart as men him told, Duk Theseus the streite way hath hold. And to the launde he rideth him ful right, Ther was the hart ywont to have his flight, And over a brooke, and so forth on his wey. This duke wol have a cours at him or twey With houndes, swiche as him lust to commaunde. And when this duk was comen to the launde, Under the sonne he loked, and anon He was ware of Arcite and Palamon, That foughten breme, as it were bolles two. The brighte swerdes wenten to and fro So hidously, that with the leste stroke

It semed that it wolde felle an oke.

But what they weren, nothing he ne wote.
This duke his courser with his sporres smote,

« AnteriorContinuar »